Ахвяраваць на дзейнасць АРР Дзедзіч
Палітыка

У Брэсце адбудзецца шэсце і мітынг на Дзень Волі!

Як паведаміў старшыня Брэсцкай абласной арганізацыі партыі БНФ Дзмітрый Шыманскі, Брэсцкі гарвыканкам даў дазвол на правядзенне шэсця і мітынгу 25 сакавіка ў Брэсце ў цэнтральнай частцы горада.

Збор удзельнікаў прызначаны на 12.00 на скрыжаванні пр-та Машэрава і Бульвара Касманаўтаў (прып. Машэрава ў бок ЦУМа). Шэсце пройдзе па пр-ту Машэрава, далей па пешаходнай вуліцы Савецкая, затым па вул. Будзёнага да плошчы Свабоды, дзе адбудзецца мітынг. Заканчэнне мерапрыемства у 15.00.

Для падрыхтоўкі і правядзення акцыі ў Брэсце створаны арганізацыйны камітэт па святкаванні Дня Волі. У склад камітэта ўвайшлі прадстаўнікі абласных структур партый БНФ, БСДП, АГП, Руху “За Свабоду”, незалежных прафсаюзаў, шэрагу грамадскіх арганізацый і ўстаноў.

Мэтамі мерапрыемства з’яўляецца адзначэнне ўгодкаў абвяшчэння незалежнасці Беларускай Народнай Рэспублікі (Дзень Волі), а таксама абмеркаванне і выказванне грамадзянамі свайго стаўлення да бягучых праблемаў эканамічнага і палітычнага жыцця Беларусі.

25.03

“Мы хочам годна адзначыць 99-годдзе абвяшчэння нашай незалежнасці. На акцыі мы будзем патрабаваць неадкладнага вызвалення ад адміністрацыйнай адказнасці ўсіх удзельнікаў мірных пратэстаў і поўнай адмены Дэкрэта №3. Мы маем намер абмеркаваць такую праблему, як прыняцце рашэнняў на мясцовым узроўні. На наш погляд большасць мясцовых рашэнняў прымаецца без уліку меркаванняў грамадзян. Мы таксама лічым, што грамадства пазбаўлена сёння магчымасці змяніць уладу праз выбары, бо выбары ў нас праходзяць непразрыста, альтэрнатыўныя кандыдаты не маюць сваіх прадстаўнікоў у выбарчых камісіях. Вырашэння гэтых праблем мы будзем патрабаваць ад улады, – паведаміў заяўнік акцыі, старшыня абласной арганізацыі Партыі БНФ Дзмітрый Шыманскі.

Па словах аднаго з сябраў аргкамітэта, старшыні Брэсцкай абласной арганізацыі Беларускай сацыял-дэмакратычнай партыі (Грамада) Ігара Маслоўскага, мерапрыемствы носяць выключна мірны характар і накіраваныя на выказванне пазіцыі жыхароў нашага горада да палітычнай і сацыяльна-эканамічнай сітуацыі ў краіне. «Мы заклікаем жыхароў горада прыйсці на шэсце і ўзяць з сабой бел-чырвона-белую сімволіку, а на мітынг напісаць сацыяльны ці палітычных лозунг на транспаранце, які адпавядае мэтам масавага мерапрыемства. Улады павінны слухаць уласны народ», – адзначыў Ігар Маслоўскі.

Па інфармацыі арганізацыйнага камітэта шэсце пройдзе пад бел-чырвона-белымі сцягамі і сімволікай партый і арганізацый сябраў аркамітэта. Выкарыстанне транспарантаў прадугледжана толькі падчас мітынгу на плошчы Свабоды. Арганізатары массавай акцыі таксама звяртаюцца да ўдзельнікаў з просьбай прытрымлівацца заканадаўства аб масавых мерапрыемстваў: не закрываць твары, не прыносіць з сабой зброю ці імітацыю зброі, не паддавацца на правакацыі, а па ўсіх пытаннях звяртацца для сябраў арганізацыйнага камітэта.

Да ўдзелу ў мітынгу запрошаны прадстаўнікі Брэсцкага гарвыканкама, каб выказаць пазіцыю гарадскіх уладаў з нагоды набалелых праблем як на ўзроўні горада, так і на ўзроўні краіны.

У 99-ю гадавіну абвяшчэння незалежнасці Беларускай Народнай Рэспублікі арганізатары брэсцкай акцыі лічаць дарэчным і неабходным правядзенне масавага мерапрыемства, якое б дакладна засведчыла адданасць жыхароў горада найвышэйшым каштоўнасцям беларускай дзяржавы – свабодзе і незалежнасці, а таксама імкнення да мірнага рашэння эканамічных і палітычных праблем, шляхам іх адкрытага абмеркавання і сумеснага прыняцця рашэнняў.

– Зараз арганізацыйны камітэт рыхтуе дакладны план мерапрыемства. Ідзе праца над праектамі рэзалюцый, абмяркоўваецца спіс выступоўцаў. Мы заклікаем усіх, хто хоча выступіць на мітынгу ці удзельнічаць у яго арганізацыі і правядзенні, звяртацца ў офісы нашых партый або пісаць арганізатарам у сацыяльных сетках, – дадаў Дзмітрый Шыманскі.

Прэс-служба аргкамітэта па святкаванні Дня Волі ў Брэсце

Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *