Калі хтосьці са знаёмых даведваецца, што я зараз жыву ў Таліне, каментарый кожнага другога: «Ці далёка да Таліна?» (песня гурта «Гарачыя гaлoвы»). Калі нехта даведваецца, што я вучуся ў Эстонскай школе дыпламатыі, то кажа: «Крута! Як ты туды трапіла?».

Кацярына Карлюк скончыла факультэт міжкультурных бізнес-камунікацый БДЭУ, працавала ў Інфармацыйным пункце Рады Еўропы ў Менску, цяпер навучаецца ў Эстонскай школе дыпламатыі.

Калі вы маеце цікавасць да міжнародных адносінаў, еўрапейскай інтэграцыі і дыпламатыі, то вам сюды. Навучанне доўжыцца 9 месяцаў (сярэдзіна верасня — травень), пасля заканчэння выдаецца дыплом. Нягледзячы на тое, што праграма не з’яўляецца магістарскай, гэта добры трамплін для далейшага паступлення ў магістратуру.

1

Працэс паступлення
Зацікаўленыя кандыдаты мусяць падаць анлайн-заяўку на сайце Школы. Неабходна запоўніць анкету, далучыць рэзюмэ, матывацыйны ліст, копію і выпіску з дыплома (афіцыйны пераклад неабавязковы), копію пашпарта, здымак і эсэ на заданную тэму.
Падчас майго паступлення дэдлайн быў 31 траўня, пасля чаго са мной правялі сумоўе ў скайпе, што заняло ўсяго 15 хвілін. І ўжо 7 чэрвеня я атрымала запрашэнне на вучобу. Для мяне адказ на пытанне “Ці пацверджваеш свой удзел у праграме” быў відавочны.

Падрыхтоўка да пераезда. Прывітанне, Талін!
Арганізатары школы дапамагаюць у адкрыцці візы, а таксама вяртаюць візавы збор па прыездзе ў Талін. На вучобу трэба прыехаць 14-16 верасня. З Менску да Таліна зручна дабірацца на аўтобусе (начны пераезд, Ecolines ці Luxexpress), квіток каштуе каля 30 еўра, што добра, паколькі дарогу ўдзельнікі аплочваюць самі.

2

Школа пакрывае выдаткі на навучанне, арэнду кватэры ў цэнтры (5 хвілін да старога горада і 1,5 хвіліны да Нацыянальнай бібліятэкі, дзе знаходзіцца офіс Школы і праходзіць само навучанне), а таксама выплочвае штомесячную стыпендыю ў памеры 450 еўра.
Заняткі праходзяць 5 разоў на тыдзень — з 16.45 да 19.45. Група складаецца з 28 чалавек з 10 краінаў: Беларусь (3), Украіна (4), Малдова (4), Грузія (4), Арменія (3), Азербайджан (2), Таджыкістан (1), Македонія (1), Афганістан (1) і Эстонія (5 чалавек).
Навучанне адбываецца па-ангельску, таму патрабуецца добрае веданне мовы.

Вучоба vs. Адпачынак
Навучанне ў Школе — суцэльная асалода. Выкладчыкі з розных краінаў, у кожнага свой стыль выкладання, але ўсе аднолькава ветлівыя. Актыўны ўдзел у семінарах заахвочваецца. Курсы інтэнсіўныя, і пасля заканчэння кожнага з іх трэба здаваць іспыт ці пісаць эсэ — на падрыхтоўку даецца месяц. Працягласць кожнага курса ў сярэднім складае 2 тыдні. Сканчваецца адзін курс, пачынаецца наступны, і адначасова рыхтуешся да іспыту ці пішаш эсэ.
Навучальны план на мінулы год можна паглядзець на сайце школы.
Школа арганізуе таксама шмат мерапрыемстваў па-за межамі навучальнага працэса — дыскусіі, канферэнцыі, экскурсіі і інш.

Ці ёсць мінусы?
Для мяне мінусаў няма. Я атрымала тое, чаго хацела, і нават болей. Я закахалася ў Талін, заўважаю толькі станоўчае і пазітыўных людзей. Адчуваю сябе як дома. Зіма такая ж халодная, як і ў Беларусі, хаця ў гэтым годзе было значна цяплей.

3

Калі жывеш у цэнтры, можна дайсці пешкі амаль куды заўгодна. Для мясцовых жыхароў праезд у грамадскім транспарце бясплатны, а паколькі студэнты Школы дыпламатыі атрымалі дазвол на часовае жыхарства, то і для нас таксама.

Умовы пражывання цудоўныя: у кватэры жыве па 3 чалавекі, у кожнага свой пакой. Побыт адладжаны, усё вельмі камфортна.

Я жадаю ўсім зацікаўленым падаваць заяўкі і лавіць удачу. Адзіная парада: падумайце, ці сапраўды вас цікавіць гэтая праграма, калі ёсць сумневы, вызвальце дарогу іншым, тым, хто дакладна вызначыўся са сваімі мэтамі.
Кацярына Карлюк

Крыніца:  adukacyja.info

[supsystic-social-sharing id="1"]