Вы ведаеце, які з беларускіх гарадоў першым атрымаў Магдэбургскае права? А што за асобы сабраліся на помніку 1000-годдзя Брэсту? Вядома, Вы хоць бы раз бывалі ў Брэсцкай Крэпасці. Каб выявіць шляхі для папулярызацыі гісторыі гораду, 9-10 лістапада ў Брэсце ладзілі круглы стол “Спадчына тысячагоддзя”.

Мерапрыемства праводзілася ў межах Грамадска-культурнай кампаніі “Берасце старадаўняе”. Удзельнікамі абмеркавання сталі прадстаўнікі БрДУ імя А.С. Пушкіна, Музея гісторыі горада Брэста, Гарадскога дома культуры, а таксама рамеснікі, мастакі, экскурсаводы, — адным словам, людзі, неабыякавыя да гісторыі роднага гораду. Асноўную тэму мерапрыемства арганізатары пазначылі так: “Культурна-гістарычная спадчына гораду і яе патэнцыял для стварэння актуальных культурных прадуктаў”.

Першы дзеньвыдаўся насычаны інфармацыяй. Дакладчыкамі выступілі Віктар Клімус (адзін з арганізатараў “Берасце старадаўняе”), Пётр Гарбуль (выкладчык кафедры гісторыі Беларусі БрДУ імя А.С.Пушкіна), Сяржук Кавалько (навуковы супрацоўнік Музея гісторыі горада Брэста), Вольга Мярчук (супрацоўнік музея “Берестье”, экскурсавод).

Мы даведаліся, што большасць сувенірнай прадукцыі адлюстроўвае Брэст-Літоўск канца XIX ст.-пач. XX ст. (пры тым, што адлік існавання гораду вядзецца ажно з 1019 году!).

Мы пачулі, які ўнёсак у развіццё гораду зрабіў Казімір Ягелончык, які княжыў у ВялікімКняствеЛітоўскім на працягу 52 гадоў (пры тым, што ягоная асоба аніяк не згадваецца ў інтэр’еры сучаснага Брэсту!).

Мы ўразіліся тым, што старыя людзі аддаюць свае рэчы ў музеі, бо яны не патрэбны іх нашчадкам (не так даўно фартэпіяна прынеслі, а самай старажытнай з ахвяраваных рэчаў 300 год!)

Мы пераканаліся, што веды нашы абмежаваныя, а энтузіязм бясконцы.

Што абмяркоўвалі?

  •  Візуальныя вобразы. Якія выявы нанесці на сувеніры? Што цікава набыць акрамя магнітаў? Як адлюстраваць архітэктурныя помнікі, якіх больш няма?
  • Інфармацыя. Якія падзеі ў гісторыі гораду варта святкаваць ды помніць? Каго з вядомых берасцейцаў зрабіць героем беларускіх коміксаў і маляванак?
  • Інтэрактыў. Як арганізаваць касцюмаваныя шэсці па розных эпохах? З якімі кавярнямі дамовіцца наконт фірмовай беларускай стравы? Хто будзе набываць настольныя гульні накшталт “беларускай манаполіі”?
  • Турызм. Якія экскурсіі больш за ўсё цікавяць мясцовых ды гасцей? Чаму ў экскурсійных матэрыялах няма інфаграфікі? Калі ў Брэсце з’явіцца інфармацыйны цэнтр з бясплатнымі мапамі?

Каб ператварыць думкі ў рэальныя высновы, як кажуць, трэба з імі пераночыць.

Другі дзень быў прысвечаны абагульненню інфармацыі па кожнаму з накірункаў і вылучэнню самых верагодных для выканання ў бліжэйшы час пунктаў. А ўвечары можна было заслужана адпачыць: паслухаць этнамузыку гурта «Cad Goddeu» і патанчыць сярэднявечныя танцы з клубам “Берасцейскі замак”.

Што вырашылі?

  1. Паставіць на вуліцах тантамарэскі (стэнды для фатаграфавання) і павесіць білборды з выявамі гістарычных асоб, звязаных з Берасцем. Нашыя новыя аватаркі стануць больш змястоўнымі.
  2. Падрыхтаваць дакладныя звесткі па важных датах/падзеях, якія павінен ведаць кожны берасцеец. Нашыя веды пашырацца, і больш не будзе сорамна пераз іншаземнымі турыстамі.
  3. Аднавіць старажытныя святы і адзначаць не толькі Дзень гораду. Нашыя святочныя дні напоўняцца зместам і цікавосткамі.
  4. Распрацаваць новыя турыстычныя маршруты і намаляваць інтэрактыўную мапу гораду. Наш горад стане больш цікавым для берасцейцаў і прывабным для турыстаў.
  5. Пабудаваць ратушу ў знак таго, што Брэст першым з беларускіх гарадоў у 1390г. атрымаў Магдэбургскае права. Пакуль не вырашана, хто і дзе зможа яе пабудаваць.

Калі Вы адчуваеце непераадольнае жаданне паўплываць на паляпшэнне культурнага вобразу горада — далучайцеся да грамадска-культурнай кампаніі “Берасце старадаўняе”!

Аўтар: Вольга Малафеечава
Фота арганізатараў

 


[supsystic-social-sharing id="1"]

Каментарыi

  1. Наталля
    Ответить

    Будаваць Ратушу — самая яскравая ідэя. Я, нават, дапамагу, калі гэта стане реальнасцю!

    Thumb up 0 Thumb down 0

    • dzedzich
      Ответить

      Ратуша стаяла ў сённяшняй цытадэлі — недалёка ад тэрэспальскай брамы. Зараз на яе месцы нічога няма, трава расце. Таму адбудаваць яе цалкам рэальна. І падмуркі знайсці можна, я думаю.

      Thumb up 0 Thumb down 0

Дадаць каментарый