(інтэрв’ю з музыкам + mp3)
Аляксандр Патліс, адзін з самых раскручаных артыстаў Беларусі, графік гастроляў якога распісаны на месяцы наперад, сустрэўся з карэспандэнтам dzedzich.org, каб распавесці аб сваім новым альбоме «Читай мои мысли».

— Як ішла праца над новым альбомам?

— Узмоцнена — апошнія паўгода. Да гэтага вельмі расслаблена амаль паўтары (смяецца). А калі сур’ёзна, то песню «Кто сказал?» я і зусім думаў не ўключаць у альбом. Яна была напісана спецыяльна для адборачнага тура «Еўрабачання», дзе я дайшоў да фіналу, але перамог тады Пётр Ялфімаў. Зрэшты, песня — гэта ўсё-ткі частка жыцця, таму было прынята рашэнне ўключыць яе ў трэк-ліст.

— Чаго чакаць слухачам ад новага альбома?

— Мне як музыканту цяжка казаць, ці адрозніваецца гэтая праца ад іншых ці не, таму што гэта ўсё ж такі маё тварэнне. Я не магу сказаць, што вось гэты сын прыгажэйшы і лепшы папярэдняга. Гэта ўсё павінен вызначыць слухач. Асабіста для мяне гэта нейкі новы этап у жыцці, трохі іншая лірыка. На альбоме будзе адна песня на ўкраінскай мове. Нам часта даводзіцца выступаць ва Украіне. Увогуле, я проста прапаную паслухаць працу. Тыя, хто ведаюць альбом «Второе дыхание», змогуць супаставіць і параўнаць. Мае сябры, якія слухалі новыя песні, не маглі пазнаць мой голас. У некаторых кампазіцыях я змяніў манеру падачы вакалу. Напрыклад, у песнях «Hello», «Мыслями связаны», «Стань светом…» гэта асабліва чуваць. У цэлым на альбоме ёсць 5-6 песень, якія мне асабліва падабаюцца. Ёсць у іх асаблівы нерв, месцамі нават Псіхадэлія на мяжы музычнай шызафрэніі! (смяецца)

— Як плануеце арганізоўваць прамоцыю новага альбома?

— Ужо 28 траўня — Масква, 5 чэрвеня — Кіеў, увосень — Германія. Атрымалі прапанову выступіць у жніўні ў Чэлябінску. 1 чэрвеня я ўжо ў другі раз буду ўдзельнічаць у акцыі «У абарону жыцця», прысвечанай Дню абароны дзяцей. Яна пройдзе ў канцэртнай зале «Менск», і ў другім аддзяленні ў нашага гурта будзе выступ на цэлую гадзіну. А цалкам, прыгожую праграму я ўсё ж буду рыхтаваць на восень. Улетку мы аддамо песні на радыёстанцыі, здымем кліп, а ўжо восенню прэзентуем альбом у Беларусі. Таксама мы плануем запісаць 1-2 песні на беларускай мове. Плюс цяпер ідуць перамовы з Vincent’ом. Магчыма, мы зробім сумесны праект.

Даведка «Дзедзіча»:

Свет даведаўся пра Аляксандра Патліса ў якасці саліста гурта «Новы Іерусалім» ў 1992 годзе. Аднак праз 14 гадоў сумеснай творчай дзейнасці дарогі музыкаў разышліся і Аляксандр пачаў уласную кар’еру. У 2008 годзе выйшаў яго першы сольны альбом «Второе дыхание». Праз тры гады пасля першай пласцінкі Аляксандр прэзентуе новы альбом «Читай мои мысли».

Аляксандр Патліс выказвае падзяку гукарэжысёру Андрэю Баброўка — «чалавеку, які працуе не для сябе, а для артыста» і Віктару Пшанічнаму за дапамогу ў запісе вакалу.

Аляксандр Патліс

Аляксандр Патліс

[supsystic-social-sharing id="1"]