Ахвяраваць на дзейнасць АРР Дзедзіч
ПалітыкаБлог ДПШ

Д. Шыманскі – на мяне глядзелі воўкам

Добрыя сябры папрасілі мяне завесці блог на нашым сайце. Адмовіць не магу, бо таксама зацята хварэю за яго папулярнасць. Пра што буду пісаць, пакуль не вырашыў, таму пішу пра тое, што адбываецца навокал.

Учора я даведаўся пра сваё ўключэнне ў склад участковай камісіі № 15 па выбарах прэзідэнта РБ. Гэта Сярэдняя школа № 13, месца, дзе галасаваў з 1994г., яшчэ за З. Пазняка.

Сёння ў 8-53 патэлефанаваў спадар Парафенюк А.А., упраўляючы справамі Адміністрацыі Ленінскага раёна, запрасіў на першае пасяджэнне.

Прыйшоў. Сваю кандыдатуру ані на старшыню, ані на сакратара не вылучаў, бо без сэнсу. Першыя 15 хвілін усе і так глядзелі на мяне волкам, быццам баяліся, што я ў іх мабільнік з кішэні выцягну. Што ў прынцыпе не дзіўна. Камісія складаецца амаль цалкам з настаўнікаў той самай СШ № 13, працуе стабільна з года ў год, і тут нейкая новая асоба!

Прыйшлося запусціць на поўную сваю абаяльнасць і юрыдычную пісьменнасць. Першае, што вырашылі: калі чалавек не зарэгістраваны (па-старому – прапісаны) на тэрыторыі ўчастка – галасаваць ён у нас не будзе (пакуль я не выступіў, большасці гэта было не да канца зразумела).

Другое пытанне, якое хвалявала сябраў камісіі – хто будзе развозіць усіх пасля заканчэння працы. Прадстаўнік Адміністрацыі паабяцаў пытанне вырашыць. Прызначылі сход на сераду, каб размеркаваць дамы, хто дзе будзе хадзіць і ўдакладняць спісы выбаршчыкаў.

Агульная выснова з убачанага: сабраліся людзі рознага узросту, з вышэйшай адукацыяй, настаўнікі, але мазгі – як з канвеера, зацята непрабіваемыя. На носьбітаў іншай думкі глядзяць, як на іншапланетніка. Магчыма, гэта суб’ектыўная ацэнка, але што зробіш, блог абавязвае выказвацца суб’ектыўна 🙂

Адзінае, што пакуль давялося выразна пачуць – абяцанне намесніка старшыні камісіі знайсці празрыстыя скрыні. Скрынямі, па яго словах, нас забяспечыць ЦУМ (кіраўнік – Віктар Валюшыцкі, былы камсамольскі лідэр, які своечасова і ўдала перакваліфікаваўся ў гаспадарнікі).

Што датычыцца тэхналогіяў пазбягання фальсіфікацый, то сур’ёзных рэчаў (кругласуткавае назіранне, нармальнае апячатванне, падпісванне кожнага бюлетэня і ўсё такое) пакуль не краналіся. Паглядзім, што будзе далей.

Сярэдняя школа № 13

Сярэдняя школа № 13

6 каментарыяў

Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *