Ахвяраваць на дзейнасць АРР Дзедзіч
Палітыка

Несапраўдныя выбары ў несапраўдныя саветы

Ніводзін кандыдат ад Партыі БНФ, Руху “За Свабоду” і моладзевай арганізацыі “Маладая Беларусь” паводле папярэдніх звестак не стаў дэпутатам мясцовых саветаў. Пра гэта паведамілі падчас прэс-канфэрэнцыі Аляксей Янукевіч, Аляксандр Мілінкевіч і Артур Фінькевіч. Палітычныя лідэры ацанілі выбары як скрайне недэмакратычныя, адзначылі поўную адсутнасць магчымасці для кандыдатаў і сябраў іх камандаў хоць якім-небудзь чынам назіраць падлік галасоў, пералічылі шэраг іншых парушэнняў.

Аляксей Янукевіч: “Учора адбыліся несапраўдныя выбары ў несапраўдныя саветы. Мы пабачылі, што дэкаратыўныя змены ў выбарчае заканадаўства – проста нахабная насмешка з боку ўладаў. Тысячы парушэнняў, што былі зафіксаваныя дэмакратычнымі кандыдатамі, іх даверанымі асобамі і назіральнікамі, паказалі, што ўлады правялі добрую рэпэтыцыю перад прэзэдэнцкімі выбарамі, якія, паводле Мікалая Лазавіка, могуць адбыцца ўжо ў гэтым годзе. Парушэнні былі такім: штучнае “нацягванне” яўкі, калі людзей пад прымусам заганялі на выбарчыя ўчасткі, бескантрольнасць вынасной скрыні для галасавання, калі сябры выбарчых камісій бралі яе і ішлі да тых людзей, якія не прагаласавалі на ўчастку, адсутнасць раздзельнага падліку галасоў”.

Аляксандр Мілінкевіч: “Нягледзячы на афіцыйныя вынікі, мэты, што ставіліся перад выбарамі, мы дасягнулі. Мы пабачылі, што ў грамадзтва нарастае пратэстны настрой, паказалі людзям альтэрнатыву, распавялі пра мэханізмы фальсіфікацыяў. Мая перакананасць ў тым, што ў любых выбарах абавязкова трэба ўдзельнічаць, не знікла, а толькі ўмацавалася. Удзельнічаючы ў выбарах, мы павышаем пратэстны настрой, ствараючы спрыяльную глебу для наступных прэзыдэнцкіх выбараў”.

Артур Фінькевіч: “Падчас выбарчай кампаніі актывісты “Маладой Беларусі” абышлі 8000 кватэраў. Мы пабачылі, што людзі нас падтрымліваюць, дзеляцца сваімі праблемамі, чакаюць ад нас іх вырашэння. Я перакананы, што цяпер на нашых акругах мы мусім працягваць працаваць так, як быццам бы мы ёсць абранымі дэпутатамі”.

narodny.org

Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *